月尾又見粉飾櫥窗，但走勢仍是高開後向下派發，似乎是趁高開淡倉。有戰友認為「報紙都話資金跟住大行報告炒，氣氛好好喎！」論點其實相當趣怪，查實外資芬佬於低位收貨，之後出報告散貨係常態。至於熱錢幾時都有，見報告就追炒，係因為市面根本冇其他炒作主題，於是集中火力煲三兩隻股，令報告自我實現。又點算係氣氛好？
個股強勢必有基本因素支撐，近排推介的舜宇光學（2382）、金山軟件（3888）及中國無線（2369）齊創新高，億和（838）亦靜靜雞大成交破位，不妨留意。
阿里巴巴46億銀入股新浪微博18%，估值遠高於市場預期，可見科網股有價，隨時觸發另一次炒作熱潮。騰訊（700）及金山軟件近排持續炒上，二三線科技股尋寶，央企股首都信息（1075）可以冷吼。該股主要為北京醫療、交通、金融等機構提供IT解決方案，另為客戶度身訂造軟件產品及提供雲端服務，最近獲中央確定為重點軟件企業，稅率由15%降至10%，有助提高盈利之餘，亦顯示業務獲阿爺肯定。
公司去年純利8,559萬人仔，按年增長10%，現價歷史PE僅10倍，息率4厘，另持有逾1億元淨現金，財務穩健，中線睇5毫，現價有三成水位。
魏力
http://www.facebook.com/2012jason
本欄逢周一、二、四、五刊出