大家呢排上facebook，有冇發覺啲「乜乜Secrets（秘密）」嘅討論區，例如港大Secrets、廣播道Secrets等，有如雨後春筍般咁出現？
大家可能會話：「香港用戶卒之識點用facebook啦！識得用呢個渠道爆秘密！」呢個原本都係我嘅諗法，因為呢啲討論區都真係講啲外邊人唔知嘅事，例如，大學學期最尾嗰堂，啲學生會想盡辦法電啲阿Sir同Miss。
推廣策略抵讚
點知，同隔離版利世民傾起呢啲討論區時。佢話呢啲係花旗國底衫褲零售商Victoria's Secret（VS），因就快喺香港第一店登陸前，喺網上社交媒體嘅市場推廣活動。
佢講完，我都服。因為冇理由忽然有咁多Secrets網頁突爆。
除咗乜乜Secrets外，令一呢排網上勁爆嘅題目就一定係貨櫃碼頭罷工事件。見有網友分享，話因碼頭大股東係和記黃埔（013），所以就傳短訊叫朋友唔好幫襯百佳。咁個朋友覆話：「冇喎，我一路都冇幫襯百佳。我都係去維多利亞多。」真係團結啊！第時真係唔知有冇維多利亞Secrets嘅討論區啊！到時可能會有網有話「No Pic, No Talk」囉！
點都好，呢啲討論區係咪佢哋搞出來都好，都真係要讚VS啲市場推廣策略。
以前，我其中一隻愛股係同VS一樣，做底衫褲嘅安莉芳（1388）。當年2010年時，一路坐佢上。因為當年大陸工資係咁升，而我估女工人有多咗錢之後，就會買啲靚Bra同底褲着，因為就算出面着件工廠制服，裏面都可以繼續beautiful！
不過根據我19歲朋友話：「後生嗰輩唔去安莉芳啦，不過我就會睇吓VS。」我就對安莉芳樂觀好多，下個禮拜二再講佢盤數。
孫柏文
獨立股評人
http://facebook.com/shuen
本欄逢周二、四刊出