一群大學生霸佔朗豪坊星巴克討論功課，連買杯咖啡做個樣都冇，即使正值周日繁忙時間全店爆滿，其間不斷有買了飲品的顧客在旁等位，又有「被勸喻」，學生們「話之你」繼續霸佔，被網友拍下照片圖文並茂指摘。報上讀者紛紛留言同聲討伐，都說情況非常嚴重，不只是星巴克，其他快餐連鎖店亦一樣有大、中學生「打躉」霸佔座位打機做功課瞓覺嬉戲都有。當中有城大學生投訴圖書館座位被同學物品霸佔唔畀其他人坐，學校被迫出招掃走無人超過半小時座位的物品來對付。最心噏的是一位71歲老人家的留言，大嘆即使有2元任坐的乘車優惠，想去遠一點的地方走走看看都不能，因為即使車廂設有關愛座，都被後生仔女霸佔，個個自顧自篤機玩電話，有持枴杖老人站在面前一樣視若無睹無動於衷。
我在人流勁旺的銅鑼灣麥記見過兩位女大學生，拿着蛋糕一盒施施然搵位坐，然後大模斯樣開餐，完全冇幫襯，眾目睽睽之下食完，還要留低紙盒垃圾等人收拾，乾手淨腳拍拍屁股走人，「腹有蛋糕氣自若」，不愧是百年老店高尚學府的門生，我不得不寫個「服」字！
上次浸大各學生會搵良心老闆明哥贊助茶點的風波，我不想落井下石選擇忍手，但見不少同學理直氣壯依然認為他們冇錯在網上留言反駁，用辭之粗鄙、觀點之荒謬橫蠻偏激，令我不寒而慄。學生年少處世做事經驗都淺，考慮不夠周詳在所難免，經一事理應長一智不就是了？何須張牙舞爪劍拔弩張？
最基本做人應有的禮貌同情心公德心、要遵守的規矩秩序，大學生怎能不識？我們的未來棟樑，究竟點解會變成咁？
張慧敏
http://www.facebook.com/HKcareerdoctor