俄羅斯索女網球手舒拉寶娃日前返祖國首都莫斯科，出席自己名下糖果品牌Sugarpova活動。舒娃雖然成日忙爆，不過連場活動都冇影響佢靚爆心情，不停喺facebook同twitter留言同球迷分享喜悅！
有jet lag 食消夜
舒娃周日贏咗德國斯圖加特網賽之後，就飛返俄國，上機前仲喺twitter同俄羅斯球迷預告定自己行蹤。雖然俄羅斯時差快德國兩個鐘唔算多，但係舒娃好似有jet lag，周一凌晨4點自爆喺酒店房叫咗一大堆俄國美食做消夜。
周一舒娃一早就喺酒店門口同一架保時捷房跑合照，香車美人冧facebook粉絲，短短一日就吸到15萬個like。之後佢去電視台上清談節目《Evening Urgant》，到埗後仲同主持人Ivan Urgant合照。舒娃夜晚仲為Sugarpova做宣傳，去咗市內一間大型超級市場開簽名會同接受訪問。雖然忙咗成日，但係舒娃心情依然好靚，仲喺糖果品牌fb專頁同個人twitter多謝莫斯科市民咁熱情。佢仲話咁多人到場好難以置信：「我唔能夠相信今晚咁多人嚟Azbuka Vkusa。太震撼啦！多謝你哋呀，喺莫斯科鍾意Sugarpova嘅朋友！」周二舒娃着上一身白色連身裙為礦泉水商拍廣告，場外生活真係多姿多采！