首富對碼頭工潮冇嘢好講，有讀者向八方報料，話噚日見到一架車牌係CKH嘅私家車，喺禮賓府駛出嚟。心水清嘅讀者都知，CKH喺長實集團簡稱，呢架係長實專車，專門載老闆。莫非誠哥又同梁振英撐枱腳？
長實專車駛離禮賓府
報料嘅讀者話，因為當時滂沱大雨，目擊者只係見到架專車前座坐咗保鑣，但就睇唔清後座乘客嗰樣。佢又話架車冇保鑣車隊護送，駛離禮賓府後就直接返咗長江中心。
咁究竟係邊位李生揀呢個時候同狼英食飯呢？大家又有冇傾吓點樣解決碼頭工潮問題？八方噚日下晝就分別向特首辦同長實查詢，特首辦傍晚回覆話，特首不時都會見吓社會各界人士，但就唔肯講究竟係同誠哥定係鉅少共晉午餐。至於長實就一直冇回覆。
誠哥一向支持唐唐，唔妥狼英做特首，但唔妥歸唔妥，搵錢都係最實際，所以去年5月底狼英已經去過長江中心拜會誠哥，仲一齊食飯。唔知誠哥今次係咪禮尚往來，去番一次禮賓府作客呢？