32歲嘅中國籃球icon姚明，自2011年退役後就進軍商界，投資紅酒業之餘，仲係CBA上海大鯊魚嘅班主。今晚6點「中國巨龍」會率領球隊，喺澳門金光綜藝館出戰「國際群星籃球對抗賽」，對手係披頓等前NBA球星組成嘅聯隊。兩隊噚日抵埗後，晚上一齊出席晚宴。呢場波門票收入會捐畀雅安地震災民，而且大會亦會捐出相同金額賑災；波飛售價港幣80至468蚊，即場有售。