保皇黨同狼英個問責團隊有一樣嘢好合拍，就係遇事即閃，最叻就係玩潛水，對任何敏感問題唔聽、唔講、唔理。繼2010年「冷處理」公民黨、社民連嘅五區總辭，變相公投之後，八方聽聞，保皇黨最新任務，就係要「攤凍」佔領中環，唔畀呢個議題炒熱。所以呢，最近喺六間大學巡迴搞緊嘅佔中論壇，好多建制派悍將都耍手擰頭，有人仲用一啲好「特別」嘅理由拒絕出席。
李慧琼唔畀面母校
好似前日喺香港大學搞嘅佔中論壇咁，學生本來請立法會主席、民建聯曾鈺成出席，等佢同戴耀廷同場辯論，點知曾主席唔賞臉。但大家估佢用乜嘢理由拒絕學生？聽聞佢話自己當日唔喺香港喎。吓！唔係嘛？佢前日明明喺立法會主持緊會議，贒實長毛有冇發言重複，諗緊計剪人布喎，點會唔喺香港呀？唔通曾主席係講緊佢個心唔喺香港？
科大想喺5月7日請民建聯李慧琼同戴耀廷、成名對談㗎。點解請李慧琼？人哋係科大星級校友嘛。但校友又點呀，一講到呢個話題，母校都冇面畀，一直冇覆人哋究竟會唔會出席。城大喺5月2日都會搞同樣嘅論壇，想請喺城大教書嘅鼠王芬辯論，不過鼠王芬都係一直唔理人哋囉。好彩仲有法律超人謝偉俊答應出席，同戴耀廷辯個明白。睇嚟謝偉俊算係建制派內最「大粒」嘅人物，敢同戴耀廷同場傾佔中，可以話勇氣可嘉。
mailto:[email protected]