𠵱家全世界幾乎都做咗低頭族，每分每刻都係睇住部智能電話，傳媒嘅競爭已由報紙搬咗入部電話。面對呢股多媒體競爭，《信報》公佈最新嘅人事調動，行政總裁羅燦近日出信，宣佈人稱「警長」嘅總編輯陳景祥，會轉為《信報》副社長兼數碼媒體總裁，專責搞數碼新媒體發展，研究點打呢場仗同研究資訊內容，又話會增撥人手配合發展。
至於總編輯就會由執行總編輯陳伯添署理，全權負責報紙一切編採事宜。聽聞由羅燦入主《信報》嘅一刻，換人已係必然結果，兩年都未有郁手，都因為警長係《信報》董事之一。但聽聞今次警長被換走，即使acting嘅陳伯添亦都未必能夠坐穩，邊個先係正印，仍然係個謎。