部份響應保衞香港自由聯盟呼籲，參與咗不合作運動，交少咗10蚊稅嘅市民，陸續收到稅務局嘅追討。讀者黎小姐都響應咗呢個運動，仲啱啱收到稅務局追回欠交10蚊稅嘅信，信中講明如果指定寬限期內唔交，就會徵收罰款。佢好開心咁話，原來用交少十蚊稅向狼英抗議，真係冇乜嚴重後果㗎！
4月係唔少市民第二期稅款嘅到期月份，八方噚日問稅局，究竟有幾多市民交少咗10蚊稅。稅局發言人話暫時冇呢個數字，而整體欠稅率及金額等資料，一般都只會喺年度完結後先公佈喎。
政府拒公佈人數
「佢哋點可以唔公佈㗎？」聯盟成員兼立法會議員范國威話，之後會喺立法會質詢稅務局，要求佢公開今次交稅期內欠稅嘅數據，因為憑數據可以估計究竟有幾多市民，透過交少10蚊稅表達對政府不滿。
不過，黎小姐話，佢收到信後已經按要求交番10蚊稅，「之前交少咗已經表達我對政府嘅不滿啦！」根據《稅務條例》，市民交唔足稅，稅務局局長可以採取追稅行動， 包括徵收5％附加費等。雖然范國威估稅局未必真係會花資源去追咁少嘅罰款，但黎小姐話唔想蝕畀佢，「都已經不滿佢，仲畀錢佢賺咩！」