今日是五．一勞動節，碼頭工潮令打工仔被老闆剝削的「舊事」成為焦點，當和黃（013）大班霍建寧兒子每日都要做廿個鐘之際，香港寬頻行政總裁楊主光卻反其道而行，大鬧不推五天工作的公司「好離譜」，高喊「賺到盡唔係公司目標」，揚言寬頻月費仲有得減！
記者：石永樂
先旨聲明，這個訪問於碼頭工潮爆發前所做，楊主光抽水的嫌疑應該小一點。香港寬頻為本港第二大寬頻服務供應商，去年因魔童王維基「籌錢」搞電視業務，將之以50億元售予私募基金CVC，被賣的包括楊主光及60多名管理層，CVC讓這班管理層斥近1.7億元入股公司（13.1%）做老闆，但這班老闆仔竟然「作反」起來，「唔單止為股東賺錢，我哋嘅理念唔係賺到盡。」楊主光指，同事為新的香港寬頻定下共同核心目標──「成就香港更美好家園」。
「寬頻月費仍有得減」
口講無憑，香港寬頻今年初帶頭減價。楊主光指，考慮到目前香港的經濟，寬頻月費平均不應該超過175元，「寬頻同水、電、煤冇分別，係基本需要，收費要合理，客人要負擔得起，呢啲嘢係同每個家庭息息相關……作為一間公司，賺錢要過得人、過得自己，唔可以賺到盡，尤其係我哋做生活必需品，你係要好負責任！」員工如此「倒米」，大老闆點睇？楊主光稱，CVC入主後對公司首年業務表現感滿意，每月只開一次會，業務營運完全放手讓管理層發揮。
今時今日的老闆發夢都想削減成本，楊主光亦不例外，「我覺得幾時都有（減成本）空間，同事都認為啲嘢可以再simple（簡單）啲，多啲automation（自動化）……加大生產力。」楊主光還指，寬頻月費仍有得減，「如果能夠喺營運上做到成本減省，會轉嫁畀客戶，可能收低啲（月費）都得，或者同樣價錢提供多啲服務。」
減價有助搶客，楊主光說，過去九個月香港寬頻的上客跑贏大市，目標2016年客數由65萬升至100萬，取代香港電訊（6823）成為一哥。
楊主光同時希望同事的生活可以更平衡，香港寬頻易手後改善了員工福利，增加員工年假、中秋及冬至等大節日提早半日收工、每個月有一個星期五提早兩小時下班等，「今時今日仲有部份公司，我覺得好離譜，仲唔行五天工作……休息又好、進修又好……推動同事work-life balance！」
楊主光指旗下員工上班時間減少，但上客卻增加，「我諗其他公司要學。」看來受惠的，不單止是香港寬頻用戶，還包括集團2,000多名的員工。
楊主光個人履歷簡介
1986至1989年：督察
1989至1996年：先後於其士集團、得信佳等電訊公司任職
1996至2005年：效力數碼通，離職前為客戶部總監
2005至2008年：香港寬頻營運總監
2008年至今：香港寬頻行政總裁及執行董事