【台北】周杰倫（周董）嘅女友J女郎昆凌去咗美國遊學兩個月之後，一個星期前返咗台灣，見佢肥咗足足一圈，應該都重咗6、7磅。所以大前晚見昆凌去咗男友經常去、喺台北嘅健身中心，一直練到深夜先至離開，而周杰倫嘅好朋友陳弘璟負責全程照顧阿嫂昆凌。從正面睇埋去，昆凌由面部到下圍都明顯發福咗唔少，成個人真係好似吹脹咗嘅波一樣。之後兩個人去到附近嘅便利商店買嘢食，知衰嘅昆凌只係買咗乳酪同能量飲品就收手，由友人幫手截的士離開。昆凌經理人接受電話訪問時，承認係公司要求昆凌減肥：「在美國都是高熱量的漢堡，套餐又大份。」昆凌因為體重逼近110磅，所以被公司下令要瘦身少食，仲要求佢去健身減肥。
Jolin拍拖操肌
另一方面，前J女郎蔡依林（Jolin）對自己身材嘅要求嚴格好多。同樣喺大前晚Jolin同男友錦榮去咗平溪放天燈、深坑老街食豆腐之後，仲殺到健身房由錦榮協助操練肌肉，兩人一邊訓練一邊情話綿綿，一直操到接近凌晨，至由錦榮揸住Jolin嘅平治跑車離開，不過錦榮一見到有記者上前訪問就即刻踩油走人。
撰文：李森
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/