退任廉署專員湯顯明自曾特首退任後，已經俾部份傳媒追打，但未引起注意，最近審計署發表報告，針對廉署一啲應酬食飯超支，提出批評，於是一啲有心人順勢引爆，不停供料俾政府消息報，披露湯顯明過往任內之飲食應酬，午睡煲中藥，與中聯辦不時見面，到內地訪問送曲奇餅諸如此類禮物等等。
呢啲事情若發生在私人企業，閒過立秋，但發生在廉署及廉政專員身上，就係大件事啦。一位港台員工睇呢件新聞，最為心涼，因為過往特區政府「整治」港台時，港台員工之開支、收據，無論大大小小，都俾審計署與廉署贒到實，驗屍咁驗，令港台高層（鄧忍光駕到之前）苦不堪言，呵呵，現在原來廉署其實其身不正，人亦剃其頭，想搵人同情呀，難啲咯。
睇真啲，湯顯明並非犯下彌天大罪，亦無證據顯示佢係喎，本法治原則，應該俾佢一個答辯機會，始終未審判下結論之前，任何嫌疑犯都是清白的。不過當今香港民智低落，時興輿論審判，傳媒定罪，議員行刑，湯顯明一時間百詞莫辯，名譽蒙污，水洗不清，佢應該老早知道，廉政專員非一般公務員職位，廉署以前連俾貼士十蚊都告人賄賂，完全不講情理，既然咁嚴以律人，何能寬以待己？廉政專員應該更加係苦行僧如日日守齋戒咁清苦，做乜事要向他人送禮及與別人應酬？做得呢個位就要斷六親㗎啦。
所謂物必先腐然後蟲生，自己企得歪咗，勿怪他人放料。但一位心水清老友向左丁山指出，政府消息報話「高官啞忍五年」，指湯顯明行為，高官皆知（我地市民唔知啫），但為何過去要啞忍，依家就猛咁放料？可能內有玄機嘅，放料人並非甚麼公義正義派，大有可能係政治鬥爭，打落水狗之棋子，過往有曾特首在，故此「高官啞忍」，現在有梁特首坐鎮，講多啲無妨！過去大半年，「貪曾」「貪湯」呢兩個名詞，好似孖生暹羅嬰，常常糾纏在一起，現在切割「貪湯」，顯然係項莊舞劍，志在沛公啫。但係有人忘記了，傳媒可載舟，亦能覆舟，泛民與傳媒合流在立法會內外追查廉署與中聯辦之關係，你估中南海高唔高興？會唔會請幕後人食碗貓麵？