長居北京嘅彭丹，早排自編自導自演咗部電影《南泥灣》，但部戲喺內地上映時，票房好慘淡，連500萬都冇，不過彭丹就自爆過，荷李活名導演占士金馬倫（James Cameron）有意將佢部戲拍成3D版本，引來好多網友議論，笑佢係吹水。
不過彭丹前日喺北京出席《南》片舉辦嘅延安嘅聯誼會觀影活動時，佢又有勁嘢爆，今次佢話會同奧斯卡最佳電影《ARGO救參任務》（Argo）嘅導演班艾弗力（Ben Affleck）聯合執導中美合拍片《B29情緣》。彭丹噚日接受本報記者訪問時話：「部戲年底會開拍，係一部講述飛虎隊嘅愛情故事。投資成本約8,000萬美金，因為部戲有好多外景要嚟中國拍，中方提議搵一個中國導演聯合執導，中方就推薦我，而班艾弗力身邊嘅製片人睇咗《南泥灣》好鍾意，唔反對由我同班艾弗力聯合導演，遲啲我都要飛美開會同做準備。」
卡士強勁
演員有四男四女，彭丹話：「除咗班艾弗力會演出，美方仲聯絡緊布斯韋利士（Bruce Willis）、李連杰同埋章子怡，而我到底會唔會演，我都要睇咗劇本先會作最後決定。今次同班艾弗力聯合拍戲，講真都幾大挑戰。」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/