呢排大市反彈，好多分析員即刻話唔會sell in May，原因不外乎三個：一、美日央行放水，歐央行可能減息；二、歐豬債息回落，歐債最壞時刻已過；三、美股gogogo，大行唱好話未升完。係咪似曾相識？冇錯，每次大戶派貨，市場都係一面倒唱好，如果未來兩三日港股仍居高不下，但又未能突破，戰友就要小心，下周隨時大幅殺落。
二三線股冇厘神氣，部份資金轉炒細價股，但通常好短癮，見升飛身撲入，多數如股榮所言「你追佢唔漲」，仲要嚟個大震倉嚇走散戶，奉勸股壇新手唔好貪快炒細價股。
穩穩陣陣，今日揀內房股合生創展（754）。內房政策風險似乎甚高，但銷情持續暢旺，房價越調越升，原因好簡單，就係錢太多但可投資產品太少。A股十年一場夢，散戶死心離場，有錢都寧可買磚頭，而合生就係最受惠的股份，皆因其土儲質量俱佳，達3,185萬平米，當中一半位於北京、上海、廣州及天津，土儲每平米平均價1,756人仔，現時北京房價動輒逾2萬人仔，可見合生未來數年將進入豐收期。
合生大成交突破整固而上，彭博綜合預測，今年預測PE僅9.5倍，明年更低至6.5倍，今年目標博翻半番，睇20蚊。
魏力
http://www.facebook.com/2012jason
本欄逢周一、二、四、五刊出