近年逐步將銀行業務，交棒畀兩位公子打骰嘅東亞銀行（023）主席李國寶，除咗中期、年終業績春秋二祭同一次股東會外，大部份時間都韜光養晦。之不過今日寶哥哥會現身，主持德輔道中33號，以前叫做中國聯合銀行大廈嘅物業平頂儀式。
年底完成內部裝修
95年東亞成功購入中國聯合銀行，呢座位處中環嘅甲級商廈，2010年獲批准重建，據聞新廈樓高27層，總樓面面積8.67萬方呎，相信年底完成內部裝修工程後，部份樓層將出租，可為東亞帶嚟一定收入貢獻。
中國聯合銀行乃國民黨前將軍余兆麒創立，藉貫廣東新會嘅余將軍，一生傳奇，曾當黃埔軍校教官，能操流利英語，喺美國讀大學兼完成博士學位，1948年退役軍人生涯後，在港創立中國聯合銀行。