呢個世界冇永遠嘅敵人嘅！當日同無綫鬧得唔愉快、決定離巢嘅馬浚偉，兜咗個圈又返無綫，噚日幫新劇《守業者》造型，同場仲有拍檔楊怡、麥長青（麥包）同唐詩詠等。馬仔回歸無綫之前已經是非多多，之前話9月返內地拍劇嘅佢，指明搵歐陽震華（Bobby）合作呢個劇，點知Bobby唔舒服推咗，轉咗麥包就俾佢藐。
楊怡話捉姦無聊
馬仔噚日同麥包一齊喺將軍澳電視城試造型，兩個都好好戲，見到面好好朋友咁，馬仔公開話絕對冇同麥包不和，麥包就自嘲讀得書少俾人嫌棄，兩個未拍《守業者》前先演一場《難兄難弟》。之後講到佢藐麥包，馬仔話：「絕對冇咁嘅事！私下同麥包以兄弟相稱，係搵過Bobby，但係拍時裝版，佢唔舒服推咗就改民初，一開始就屬意麥包。」唔知係咪上次同無綫合作得唔係咁愉快，馬仔今次要搵律師睇下合約，所以𠵱家仲未簽。至於俾人藐嘅麥包，佢都話同馬仔好熟，至今都係以二哥、三弟相稱，惟有當不和係宣傳啦。
另外，近日羅仲謙同岑麗香拍新劇《On Call 36小時II》時傳緋聞，有指同楊怡戀情告急，又話楊怡去捉姦！不過楊怡話單嘢好無聊，覺得捉姦字眼好影響香香，咁即係冇戀情告急？佢風騷咁話：「我只知去廁所急啫！」
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/