HIT碼頭外判工人圍堵中環長江中心接近兩星期，母公司和黃（013）主席李超人同大仔小超人，封口兼潛水，幾乎日日喺長江中心出入嘅另一位阿超──著名財經專欄作家曹仁超，竟然受到牽連，遇着一位有眼不識泰山嘅實Q，搞到差啲上唔到樓。
「唔知自己上長江做乜」
曹Sir脫離傳媒人後，2011年同好友兼思捷（330）非執行副主席鄭明訓合組基金，變身芬佬，寫字樓喺長江中心。碼頭工潮轉戰長江中心之後，大廈實Q如臨大敵，對陌生人特別謹慎。曹Sir自爆，曾經遇到實Q阻佢搭升降機上樓，對白如下：
「先生，你上去做乜？」
「唔知喎。」
「你喺度返工㗎？」
「唔係喎。」
曹Sir答得咁玩嘢，似係長毛個friend，實Q梗係攔住佢啦，結果要由另一位認得佢嘅實Q放行，佢先可以上樓。曹Sir大呼冤枉，話唔係玩嘢，指「個市咁嘅樣，我真係唔知自己上去要做乜㗎喎！」佢又唔係打工，真係唔係返工咁話。
除咗有實Q認佢唔到，曹Sir粉絲見到佢亦有懷疑。佢話，有次一支公去長江中心附近快餐店食晏，坐對面嗰位食客突然問：「你係咪寫財經嗰個曹仁超？」曹Sir唔出聲，對方接住講，「不過如果你係曹仁超，就唔會喺呢度食飯啦！」之後大家繼續低頭食飯。
查實曹Sir當時係咪擔心對方想找佢晦氣，先唔敢出聲呢？
李華華
mailto:[email protected]
