噚日，孫柏文被問到有關即時通訊嘅經濟學，其中當然有講騰訊（700）啲微信軟件。
微信係個喺你智能手機上先下載，之後再用嘅軟件。你只要上到網，佢就可以畀你打短訊、電話，同寄相、影片等。
有咁勁嘅功能，當然大家唔會再用電訊商嘅服務，咁樣內地最大電訊商中移動（941）就唔高興啦。所以𠵱家耐唔耐就傳話騰訊要財富轉移畀中移動。
澳博金沙都腳震
如果你買咗騰訊股票，係咪好驚呢個消息呢？其實，大家不但唔使驚，如果政府逼騰訊因做咗個軟件所以要畀錢中移動，呢個係天大嘅喜訊。因為當要畀錢時，騰訊可以將畀錢方式訂為固定（即如要中移動網絡用得就畀錢），同浮動（可以逐個用戶或數據量收），咁樣對騰訊對手就會係一個好高嘅門檻。
即係就算你想研發新嘅WeChat, WhatsApp等，要先畀錢中移動。咁你整新軟件已經唔夠錢，仲要畀「牌」費？點鬥呀？
當然，你可能會問，騰訊本身點賺錢？
首先，一定唔會收用戶錢。一收咗用戶就會走。咁騰訊係做收費遊戲起家，淨係賺嗰啲智商有問題玩Candy Crush嘅朋友都夠啦。不過最終極，就係可以手機賭博。一邊打短訊畀老公，一邊百家樂買閒，咁就唔好話乜facebook、新浪，連澳博（880）、金沙（1928）都會腳震。
前日，社企媒體「言論自由行」出左咗個報告講特區市民點睇香港傳媒。原來香港出世嘅人，得47%覺得傳媒善用言論自由，不過其他地方出世嘅香港人，就有71%覺得傳媒善用言論自由。
點解我無端端提呢個調查？就好似港滙自由衍生出嘅市場，有好多我哋嘅嘢，你係要聞過外國屎臭，先賞識香港花香。
孫柏文
獨立股評人
http://facebook.com/shuen
本欄逢周二、四刊出