港股繼續牛皮冇方向，不過市場資金仍在伺機吸納優質細價股，例如最近瑞銀就向客戶介紹了若干隻細價股，其中一隻華熙生科（963）既冷門成交亦不太活躍，但股價卻非常強勁，自去年9月約2.40元水平起步，至昨日最高升近8元，升幅以倍計，此股有乜睇頭值得升咁多，要詳細睇睇公司資料，但大行推介得應該不是純炒概念。
資金轉炒優質細價股
聯泰（311）是另一隻升得奇勁的紡織股，3月底公佈收購後升勢停不了，最近個多月已升近倍，究竟是一單收購谷升，定係資金重新定位追落後細價股，有待研究。
聯泰今明年兩年PE，按市場平均預測大概是8倍及7倍，假如收購對EPS有重大幫助，估值可能更低。
長升長有的優質高息股，還有貿易通（536），去年純利8,026萬元，升15%，每股基本盈利10.4仙，末期息6.9仙。營業額2.32億元，經營溢利9,179萬元，此股主要提供電子商務服務，客戶是特區政府，故盈利非常穩定，去年底港府將手上約12%股權售予主席李乃熺，每股作價1.245元，較當時市價有輕微溢價，令主席取得穩定大股東地位，股價至今都冇令股東們失望。
公司今年會集中力量開發不同範疇的保安系統產品，包括移動錢包和移動銀行。此外，Digi-Sign業務也會在今年繼續暢旺，以其6厘息率回報，應該仍會吸引好息之投資者。
歐陽風