港交所（388）主席周松崗上任後，帶領港交所成功收購倫敦金屬交易所（LME）同推出夜期，新近佢仲做埋和事佬，成功「拆彈」！講緊嘅係之前港交所行政總裁李小加，同立法會金融服務界議員張華峰喺個飯局上鬧交，激到張華峰話要向周松崗投訴。
咁啱噚日總商會舉行午餐會，周松崗以總商會主席身份現身，仲同張華峰坐埋同一枱。原先以為張華峰乘機向周松崗詐型，點知周松崗相當識做，一見到張議員，主動開聲，話「小加講咗啲嘢，可能衝撞咗你。」哇，主席開到口耍冧，張華峰條氣即刻順晒，回應對方，話只係大家表達唔同意見啫。
聽張華峰講，已經冇嬲李小加，指小加講嘢不嬲都係咁，係啲「內地領導嘅口吻」。唔知呢句係褒定係貶呢？