永嘉集團（3322）接受訪問時表示，希望五年後分拆潮流品牌D-mop上市，消息刺激股價創近兩年高。睇番永嘉盤數，都有唔少吸引之處。首先係含金量高，截至去年底，永嘉手頭淨現金達9.6億銀，即每股0.76元，以昨日收市價0.94元計，現金比例高達81%；去年全年共派息7仙，息率達7.4厘，防守力一流。
永嘉現時主要以OEM方式經營多個著名運動品牌，客戶包括adidas、Reebok等，大部份貨品出口及銷售至歐洲及中國等地，收益佔比超過九成。去年全年賺1.5億銀，按年跌35%，去年已終止Umbro分銷業務，倘撇除無形資產減值虧損及相關業務收益，盈利實升27%。
另一方面，集團生產線已開始轉移至柬埔寨，以減低勞工成本，預期明年底內地產能將減至一半，配合大力發展嘅D-mop，未來自有及代理品牌將各佔半壁江山，毛利率值得睇高一線；呢個位入場，點秤upside都大過downside。
唐牛