咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
之前有強國女「文人」批評電影《低俗喜劇》而獲獎，事後飽受批評，呢位小姐將問題推諉向自己係強國人嘅原罪。蘇亞雷斯咬人事件，成為英國眾矢之的，香港就有球評家將問題推諉給阿蘇嘅原罪，更講簡東拿、施丹之前都試過襲擊對手，但獲「傳媒善待」，我唔知呢位球評家係善忘，定選擇性失明；簡東拿事件之後，佢嘅路一啲都唔易行；與其幫阿蘇講好說話，不如畀多啲空間，等佢淡忘事件。
蘇亞雷斯停賽10場，球會同佢都放棄上訴；當然波要繼續踢，利物浦冇佢壓陣，反而6:0大炒紐卡素，錄得今季最大勝仗；阿蘇停賽嘅主要受益人，自然係另一前鋒史杜列治，佢今仗更梅開二度。利物浦喺今年1月簽入史杜列治，當時小弟已經十分奇怪，阿蘇同佢都屬於射手型，靠速度搵食。史杜列治加盟時，信誓旦旦話為咗正選上陣機會先轉會，但同阿蘇一齊上陣效果唔好，領隊羅渣士被迫打番單箭頭，搞到史杜列治加盟後，好多時都屈居阿蘇之下，擔任後備。
一場大勝當然唔可以咁早就講，史杜列治可以取代蘇亞雷斯，甚至阿蘇喺英超已沒有立足之地；不過以近期言論，阿蘇其實都意興闌珊；既然海外都有球會，好似祖雲達斯願意出高價收購阿蘇，利物浦何不順水推舟，賣走阿蘇搵番啲轉會費，下季正式由史杜列治掛帥，配合番謝拉特、達寧、軒仔等英格蘭人，起碼維護番英格蘭傳統勁旅嘅特色吧！文：牽牛