咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
舊年4月，哥迪奧拿離開巴塞，佢當時講咗句令人費解嘅說話，「如果我繼續做落去，對我同球隊都唔係一件好事。我需要同球隊保持距離。」嗰陣冇咩人理會；今日，大家都覺得哥帥有先見之明。
哥迪奧拿好清楚巴塞嘅成功周期。告魯夫幫巴塞建立「夢一」王朝，喺89年夏天贏歐洲盃賽冠軍盃開始，直到94年夏天喺歐聯決賽以0:4輸畀AC米蘭結束，前後5年；卜比笠臣同雲高爾曾以李華度同費高等幫助巴塞中興，但前後都係4年貨仔。列卡特喺03年上任，買入朗拿甸奴，到07年衰落，「夢二」王朝又係4年左右。08年哥迪奧拿接任教練，由佢同美斯、沙維一齊建立嘅「夢三」王朝已經歷4年，佢覺得呢個成功周期就嚟玩完，所以決定喺舊年嘅高峯走人。
其實哥帥好清楚點樣拯救巴塞，就好似佢上任嗰陣咁，清走細哨同迪高，提拔美斯同沙維，嚟個大換血。不過，佢𠵱家做唔出，因為佢上次推倒嘅係列卡特嘅班底；今次，佢要清走嘅係自己一手提拔嘅人。哥迪奧拿自傳作者Guillem Balague講過，哥帥知道丹尼爾同碧基呢啲球員跌緊watt，但佢同球員嘅關係就好似父子咁，哥帥喺情感上唔忍心拋棄佢哋，但現實上，巴塞需要變。兩難之下，佢決定離開。
維蘭路華做唔到哥帥期望佢做嘅嘢，因為維帥同樣睇住呢球員成名，只係哥帥嘅影子。維帥係個好好嘅守成者，但巴塞呢一刻需要嘅係一位改革者。
文：咖喱