歐舒丹（973）上周四（4月25日）公佈2013年度（3月年結）未經審核經營資料，收入增加14%至逾10.43億歐元，同店銷售僅增長2.3%，第四季度增幅跑輸首三季表現，反映收入放緩。
除此之外，歐舒丹更面臨日圓持續貶值的挑戰！皆因日本是其最大收入來源地，佔總收入約21%，期內該市場收入竟然增長唔夠1%，第四季同店銷售增長倒退情況就更加嚴重。歐舒丹已轉移視線，強調美國、俄羅斯、香港及中國都成為推動業務的新引擎，而中、俄全年收入增長高達30%及24%。不過，中、俄目前佔總收入分別為6.5%及5.4%，加埋都只係日本市場一半多啲，短期內難以彌補日本缺口。
中國同店銷售急降
摩通更發現，如果單睇第四季度，中國及俄羅斯市場其實唔多掂。當中，中國同店銷售增長出現顯著放緩，由第三季度增長近28%，急降至只有近5%，所以決定將目標價由22元降至19.50元，即係預言歐舒丹將會跌番去舊年10月份水平。
雖然近日歐舒丹股價有反彈迹象，不過由2月至4月期間，約在23元水平持續橫行，已累積唔少「蟹貨」。
另外，最近幾次升浪，都是一次比一次低，始終未能升破下降軌道。該股目前PE近27倍，估值亦唔平，在缺乏利好因素下，歐舒丹短期要衝破該關口實非易事。
瑪姬兒