（哀）狼隊前晚喺英冠主場輸畀般尼1:2後排尾2，比排尾4嘅彼德堡同尾3嘅班士利少3分；家陣要望彼德堡同班士利喺煞科戰齊齊輸波，兼自己作客大炒前列嘅白禮頓，先有望護級成功。由於佢哋幾可肯定喺兩季內連降兩級，由英超跌落英甲，故約1,000名主隊球迷賽後衝入草地，一齊用粗口鬧爆羅渣莊臣及奇雲杜里等球員，同埋坐喺觀眾席上嘅班主摩根；而部份球迷仲嬲到掟水樽同踢廣告板，更加有人一拳打穿咗後備席嘅塑膠上蓋。雖然場面有啲混亂，好彩在場嘅警員早有準備，先至冇人受傷；英國警方事後表示會就事件展開調查。狼隊若然真係降班，我求大俠希望佢哋可以重新振作，慢慢打番上嚟啦！