（哀）今季決心重返甲組嘅東方沙龍，噚日響升班關鍵戰對第2位嘅大中，吸 引到近200球迷觀戰，包括求大俠我！不過，呢支老牌球會半場落後0:1；下半場為平反敗局，好耐冇落場嘅教練兼球員李健和（圖左）都要落場搏殺。和哥上陣無耐，就由姚學文追平，臨尾有傷嘅歐偉倫亦要負傷出戰，佢搏命到連續飛鏟3腳，可惜都幫唔到球隊贏波，最終各一言和，兩隊齊齊失分；而同日第4嘅愉園就力挫已攞冠軍嘅元朗，結果反壓大中同東方，東方就跌落第4位，想要升班下周日就要贏沙田，仲要望愉園同大中其中一隊失分，形勢相當被動。總監梁守志賽後話冇計，只好怪隊波上場同包尾嘅灣仔打和，和哥賽後則鼓勵球員，話仲有一場，未必冇機。