港股三日急彈741點，A股就跌到四腳朝天，或許因為近排中央整頓債市，唔覺意搞亂資金流，大戶有錢都寧願泊去港股避風頭，令A股走弱。由於A股同香港非指數股關連性大，所以A股唔企穩，二三線股要好番都唔易。
種種因素之下，加上A股同香港非指數股份齊上齊落嘅慣性，令到近期資金集中流去大價港股，至於二三線股，升跌比例只係參半，如果咁啱揸住一批之前強勢嘅二三線股，今期順勢調整，恒指連升下都有機會輸錢。
不過，晉佳認為呢個唔尋常情況唔會維持太耐，二三線股總有機會追落後，可以趁低吸納。
正因為內地債市風暴令到資金流出咗亂子，4月份都有唔少股份無厘頭下跌，個別至今仲未出現強力反彈，昆侖能源（135）係其中之一。昆能股價喺4月18日單日急插7%，其間外界一直聽唔到重大負面消息，但呢隻股本身較多內地大戶圍飛，所以前排風頭火勢時，唔排除有人等錢使急沽貨，令股價下跌。
中短線上望16元
股價急跌幾日後，就有花旗發報告唱淡，為昆能股價急跌打圓場。花旗話未來一至兩年，昆能盈利增長空間有限，今明兩年盈利預測增幅分別只有12%同15%，睇番目前市盈率17.7倍，市盈增長率（PEG）就高過1倍，同一般二三線股比較，估值當然略貴。
不過，昆能貴為新晉藍籌，估值相對二三線股有溢價都好正常，大家可以睇番其他增長型藍籌股康師傅（322）、旺旺（151）同百麗（1880），PEG長期高過1倍，橫睇豎睇都係貴，反映市場對於有增長概念嘅藍籌股，PEG高過1倍係常態，所以昆能調整之後，其實估值已經返去合理水平。
昆能之前股價急插，但去到250日線14.39元又有番支持，9RSI亦曾經跌到接近20嘅超賣水平，大價股面對如斯超賣，市況又唔係死人冧樓，睇嚟已經冇乜短線downside，估計中短線有條件回升番去16元以上嘅橫行區域。
晉佳
本欄逢周一、三及五刊出