大市不足半個月爆升逾千點，不過唔少戰友都呻贏唔到大錢，無他，除咗指數股之外，其餘板塊升勢並非全面，好容易跑輸大市。濠賭股係其中一個表現突出板塊，市場憧憬五一假期博彩收入大旺。喺濠江做餐飲嘅佳景（703）亦靜靜起革命，值得望多兩眼。
截至去年底，佳景全年賺2.4億銀，按年增長1.7倍，主要受惠投資物業升值1.25億銀，市盈率因而急降至不足6倍；期內生意增18.2%，毛利率擴闊1個百分點至71.3%，經營毛利增19.2%，反映增長勢頭持續。佳景在澳門擁有31間餐廳及10個美食廣場櫃位，高中低檔客戶一網打盡，五一假期生意肯定旺爆，成為股價上升催化劑。彭博綜合券商預測，集團今年市盈率10.3倍，與本港上市餐飲股平均約20倍比較，折讓達五成，估值平得過份。
佳景上周五收報2.47元，升6%，10日線快將升穿20日線，形成黃金交叉利好訊號，短線勢挑戰今年高位2.75元，已有11%上升空間。
唐牛