英超球員邊個最有錢？相信唔少球迷都估到就係曼聯前鋒朗尼。據英國《星期日泰晤士報》披露，朗尼坐擁5,100萬鎊（約6.1億港元）身家成為英超最富有球員。不過有錢係咪就等於有快樂？朗尼喺下半季逐漸唔受到費格遜重用，離隊傳聞不絕於耳，我求大俠就估佢心情都係麻麻哋。
《星期日泰晤士報》就英國體壇人士嘅身家做咗份詳細報告，朗尼喺本年度嘅身家有成5,100萬鎊，比上年多咗600萬鎊。據講朗尼喺曼聯嘅周薪高達25萬鎊，加上有大量贊助費收入，成為最有錢英超球員一啲都唔奇；而第2位就係佢嘅曼聯隊友里奧費迪南，身家都有成4,200萬鎊，第3位就係唔使點踢嘅奧雲。
被貶後備屢傳離曼聯
朗尼喺前季喊走，結果球會以大幅加薪同佢續約暫時了事，但估計難免已經同領隊費格遜產生裂痕。到咗今季下半季，朗尼不時被老費貶為後備，包括喺歐聯同英足盃嘅重要賽事；就算有份上陣，朗尼又經常要墮後踢中場，唔可以喺最前線衝鋒陷陣。喺曼聯冇得發揮，近排周不時都傳出朗尼會喺季後被賣走嘅消息。不過據講朗尼唔想離開英超，而有能力負擔得起佢天價人工嘅球會又冇乜，進退兩難。雖然費格遜之前都信誓旦旦話朗尼喺下季會繼續效力曼聯，但如果繼續要串演中場，又經常喺下半場俾人換走，朗尼都好難笑得出。
可能係最有錢嘅英超球會曼城，相比之下旗下球員身家唔算好高。曼城最有錢嘅係身家1,800萬鎊嘅泰維斯；而陣中周薪最高嘅耶耶托尼，身家都係千零萬鎊，原因無他嘅，一班曼城球員嘅商業價值相對較低，贊助費收入同朗尼佢哋比差咗一大截。
費Sir係最有米領隊
除咗英超球員之外，計晒全部同體育有關人士嘅身家排名，萬人迷碧咸就以1.65億鎊（約20億港元）雄踞榜首，成為英國最有錢嘅體育人，比第2位嘅韋根班主韋倫多500萬鎊。咸哥喺全世界所有體育人士嘅排名都位列11，榜首就係美國高球手老虎活士，身家高達5.7億鎊。足球領隊方面，費格遜就以3,400萬鎊身家居首，第2位由雲格同較令人意外嘅堅尼並列。