五一黃金周星期三殺到，又係一班內地同胞到澳門搏殺，幫補濠賭股收入嘅黃金檔期，可惜永利（1128）母公司大股東Steve Wynn似乎唔得閒開心住，事關佢前妻Elaine Wynn入稟要求賣股，佢老哥大股東地位危危乎之餘，澳門新項目亦可能受到牽連，都說「夫妻檔」應該被列入上市風險因素之一。
港上市公司或受牽連
71歲Steve同Elaine離合過兩次，佢哋大學時期拍拖，1963年結婚，維持咗23年後離婚，1991年又結婚，19年後，Steve因另結新歡，同Elaine離婚收場。
外電報導，Elaine舊年要求法庭取消佢9.6%永利股權嘅禁售令，上星期再以公平為由入稟要求盡快處理。需知道Steve揸住永利9.9%之外，仲控制住Elaine手上嘅股權，夾埋成為公司大股東，只要Elaine可以賣出一半股份，Steve嘅大股東地位隨時生變。
香港小股東咪以為呢單只係發生喺拉斯維加斯、關係母公司嘅婚姻糾紛，根據永利所講，若然Steve股權有變，公司要即時贖回一批總值234億港元（30億美金）嘅債券，本身孭住唔少債嘅永利，可能要借錢債冚債，甚至影響投資額達312億元嘅澳門路氹項目，即係可能牽連到香港上市公司！
都說夫妻檔應該喺招股書列為風險因素，早前例子就有雅天妮（789）、米蘭站（1150）同龍湖（960），小股東惟有希望男女雙方私下擺平件事啦。
李華華
mailto:[email protected]