【本報訊】至親自殺對家人造成難以痊癒的創傷。5年前一個下午，小茹（化名）推開家門，驚見丈夫燒炭身亡，沒留下片言隻語交代原因。自此她陷入無盡自責：「我好想有答案，係咪自己做得唔夠好？」家中驟逢巨變，三母女心有千千結，幸好長女Tiger（化名）以書畫傳情，讚揚母親堅強似石，彼此扶持走出陰影。
記者：潘柏林
女兒Tiger（14歲）憶述事發後一直拒絕承認爸爸自殺，直至媽媽一星期後再次說出事實，「唔係最親嗰個同你講呢件事，你唔會相信，要到阿媽講多次，心裏先肯認。」小茹也一直逃避、自責，「嗰幾日好唔真實，警察攞佢嘅銀包和身份證畀我……理性知道件事唔係自己錯，但不停咁問點解？」
被老師鬧醒重拾衝勁
丈夫自殺傷透三母女心，小茹失去煮飯和做家務的動力，三餐均叫外賣；Tiger打機、逛街麻醉自己，成績一落千丈。學業成為兩母女屢次爭執的導火線，小茹指丈夫自殺後，更逼切催谷女兒讀書，希望她日後可獨立生活，「我癲㗎啦，有一次鬧得佢好犀利，成本手冊掟過去！」
直至英文科老師當頭棒喝，「佢話你咁樣唔得，成績由精英班中游跌至普通班水平，佢講到嗰句，我就意識到自己真係好頹，於是有種向上爬嘅衝勁！」Tiger小五開始重拾課本，也致力彌補與媽媽關係，在家中留下書畫鼓勵母親。一次小茹在床頭撿到女兒的鼓勵紙條，「佢寫阿爸係一個軟弱嘅人，但阿媽好似石頭咁堅硬，咁你就有好大勇氣，原來你喺阿女心目中係咁堅硬，你又點可以冧呢？」小茹珍藏那小字條至今，偶爾拿出來鼓舞自己。
一年後，母女關係和生活步入正軌，小茹每日煮愛心飯餸，每逢亡夫生忌和死忌，更外出「食大餐」。兩人終可坦然面對至親自殺，更主動談及爸爸生前趣事，小茹說：「爸爸嗰時又會咁大懵，一白一黑嘅鞋都會着錯！」Tiger立即補一句，「仲要左右調轉！」