作為問責局長，理應就爭議性話題開腔回應㗎。偏偏發展局局長陳茂波惜「腔」如金，對爭議問題永遠只透過「局長隨筆」回應。噚日佢又發謬blog嘞，名副其實「有膽blog、唔敢talk」。
懶理邀論軍用碼頭
淨係計4月份，陳茂波都出過五次隨筆，除咗連續四個星期日，仲有喺4月1號發出，力挺要靠填海造地紓緩住屋荒嘅blog。最激嗰篇係上周日（21號）嗰篇，死撐解放軍要喺中環建軍用碼頭法、情、理兼備吖，斥外界嘅指控「豈有此理」。
查實如果茂波有理，點解唔公開反駁，一味做鍵盤戰士？有團體邀請佢下就解放軍碼頭辯論，佢都未敢應約。佢噚日又發謬blog，引述外界擔心發展元朗南會變成菜園村翻版喎。查實佢知唔知齋blog唔talk有鬼用？
八方問過環保觸覺發言人譚凱邦，佢覺得呢種寫blog模式比較單向，缺乏同公眾嘅討論空間，期望政府與民共議，唔係每周發一篇文就當溝通咗。佢哋邀請咗茂波公開討論填海議題，但遲遲未有回覆囉。