吳嵩50歲生日，按西方人慶祝年到半百嘅習慣，在六國酒店擺番幾圍酒，宴請友好，爸爸媽咪特別從雪梨飛回香港參加。點解要在六國呢間老牌酒店呢？吳嵩話潮流興懷舊，佢嘅爸媽五十幾年前結婚，就係在六國擺酒嘅，慶祝結婚五十周年之金婚宴又係在六國，故此佢特別揀番六國做慶祝五十歲之場地，仲搵埋酒店經理商量，搵出1963年嘅宴會菜式，古法炮製，等我地懷念吓喎。五十年前六國一圍酒，要幾多錢？吳嵩話係128大元，依家升咗50倍都唔止。
此乃通脹之過，假若40年前在55歲退休，今天拿着40年前之退休金，交租都交唔起。唔怪得退休人士特別有通脹焦慮症。講錢就容易精神低潮，講吓笑話就會暢快啲。左丁山問吳媽媽：「吳嵩滿月之時，有冇喊個不停？」吳媽媽話：「阿嵩好早就知道能放能收嘅嘞，日頭乖到冇得頂，好靜，晚上十一時我地要上床嘞，佢就開工，一直喊到朝早五點，晚晚如是，湊得我地好辛苦！」
喊得咁多，或者係天生註定做開籠雀都唔定。吳嵩呢晚請客分幾組朋友，有馬會馬圈組如馬會董事周永健、利子厚、徐雨石，有馬經傳媒組，有聖保羅男女校同學，有傷健策騎協會如莊偉茵，有殘奧委員會如周一嶽、馮馬潔嫻，還有2008年殘奧馬術賽主腦林煥光。佢嘅聖保羅同學葉禮德（香港律師公會主席）爆料話，讀書時吳嵩最多嘢講，唱歌朗誦攝影樣樣有份，葉禮德夾Band寫歌，吳嵩就做填詞，總之多才多藝。係囉，咁活躍嘅人，後來去澳洲讀商科，攞埋碩士加澳洲會計師牌照之後，就開始覺得會計工作好悶，成日去馬場，又識得澳洲新報嘅老編容啟輝，剛好容啟輝係左丁山之新亞同學，容啟輝介紹我地兩個相識，後來就俾左丁山說服，放棄澳洲會計師職業，返嚟香港講馬寫馬賣馬，一舉成名，此乃命也。吳嵩之子大概得到佢嘅DNA遺傳，對音樂特別有興趣，Arthur仔提早離開聖保羅男女校之後，返雪梨考入雪梨科技大學，主修音響及音樂設計，未畢業，EMI已搵佢簽約，但Arthur與朋友組織隊樂隊，叫做What It's Worth，第一隻歌已打入雪梨JJJ排行榜，五月出第一張唱片，好快聲威會蓋過吳嵩咯。