香港傳媒熱門聚腳地，位於油麻地砵蘭街嘅TC2因為業主瘋狂加租，噚晚關門大吉，稍後再戰太子。砵蘭街最後一夜喎，TC2都特別大搞散水Party，成百人噚晚專程去捧場，場面好鬼熱鬧！Party傍晚6點零開始，TC2準備咗好多嘢食，招呼成班新知舊雨，等客人任飲任食，盡興而歸。八方所見，出席者中主要都係電視台嘅幕後人員，當然唔少成日去打躉嘅報紙行家都有去捧場，大家邊食邊吹水，緬懷一起在TC2嘅日子！TC2特別喺門口寫上「告別砵蘭街，TC2太子再見」，提醒老友，佢哋會搬去太子柏樹街23號，希望趕及5月重新啟業。