楊千嬅喺香港電影金像獎攞咗影后，好多朋友都爭住請佢食飯，要為佢慶祝，日前佢老公丁子高同澳門新濠天地夾埋為佢搞慶祝派對，表面上係請千嬅過澳門睇「Taboo色惑」騷，千嬅到場後，先發現有好多朋友都喺度，實在畀佢好大驚喜，原來佢老公專登叫晒佢班老友一齊嚟陪千嬅睇騷兼慶祝榮登影后。
千嬅噚日同馮仁昭講，老公經常會畀一啲意外驚喜佢，所以呢個老公好體貼，千嬅話：「去到澳門睇呢個Taboo騷時，嗰位嚟自芬蘭嘅女表演者玩吞劍，見佢真係成把劍吞咗落口，竟然一啲事都冇，好鬼勁呀！唔知佢點解做得到。」
同曾志偉做夫妻
最近千嬅正忙於拍攝杜琪峯嘅《單身男女2》，跟住又要拍彭浩翔嘅《香港仔》，呢次夠晒突破，彭浩翔搵咗曾志偉同千嬅扮演夫妻，千嬅話：「導演一向揀角眼光都好準，我好信佢，同志偉做夫妻都幾新鮮，應該可以學到嘢㖭！」
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/