全城喪追Rubber Duck，巨鴨未落水，大家先興奮。在股票市場裏，每日都充斥大大小小的鴨仔，這類鴨叫春江鴨，形容有關人士在上市公司正式公佈好/壞消息前，偷步買貨或沽貨。當然好聽叫春江鴨，真實情況多涉及內幕交易，透過股價敏感資料獲利。
股榮每個交易日，打開報價機，總會留意五十大上升/下跌股份。股價不會「無端端」急升或暴瀉，尤其是出現大成交的異動股，除非是人為操縱、莊家搭棚引人落叠，否則通常是春江鴨所為。
統計顯示，今年以來共有約120間公司發出「不尋常價格/成交量變動」通告，平均每個交易日有接近兩間，當中約四成有解釋原因，另外近六成就話「我都唔知道」。究竟跟住春江鴨，有冇得搵食，按照今年經驗推論，你追，佢唔漲。
跟買異動股 輸多贏少
翻查約70隻今年內被要求解釋卻無解釋股價異動的股份，翌日跟住買貨，至今輸錢機會約三分之二。70隻股份中，出通告後至今平均回報負6.5%，當中有部份更是出通告後開始見頂下跌，派貨味道甚濃。
最經典例子要數仁瑞投資（2322），2月4日股價飆升一倍，成交激增數十倍，公司當晚發出不明股價異動通告，投資者如以為就快有好嘢宣佈，飛身撲入，將會是惡夢開始，股價2月4日見新高後無以為繼，三個月後的今日，累積跌幅57%。
公司發不明股價異動通告，主要是應港交所要求，絕少是自動申報，有時候就算股價或成交異動，港交所唔出聲，公司亦罕有自動回應。這種春江鴨更可怕，上周就有一例子。電池股中聚（729）周一收市後宣佈，以1億元買入2,000部電動車，股價當日抽升一成，成交較年內平均多十倍，春江鴨偷步買貨格局明顯。
大戶食到飽 散戶嘔突
原來好戲在後頭，大力掃貨表面是買車、暗裏可能獲悉大孖沙入股。周三早上，中聚宣佈超人增持溝貨，股價當日爆升26%，周一快人一步掃貨的大戶，三日賬面賺三成以上，唔食糊都對自己唔住。中聚股價周四及周五累跌7%，又係「追得到、未必好」的例子。
其實，股票炒賣的世界，同非洲大草原動物獵食一樣咁「禽獸」。大戶食完先到散仔食，但就算有得食，多是爛頭爛尾，甚至食到消化不良，隨時嘔突。奉勸一句，跟春江鴨搵食，不如追住巨鴨影相算罷！
股榮