【峯語戀之狹路相逢】獲林峯連呼七次「好愛」的吳千語BB，昨陪老闆黃百鳴到大埔亞視總台出席《第十屆全球華語大學生影視獎頒獎典禮》，其他嘉賓還包括吳思遠等資深電影人、林峯前緋聞女友陳嘉桓及亞姐許瑩等。
林峯兩位「女友」罕有同場，不過一個大方一個小家，陳嘉桓應記者要求等吳千語合照，但當千語BB做完訪問獲助手通水，即掉頭入會場，令陳嘉桓棟篤企甚尷尬。陳嘉桓被笑與情敵同場時，她反應極大：「吓！唔關我事，緋聞過咗好耐唔係真，同林峯拍完MV冇聯絡。」問到覺不覺千語BB小家？陳嘉桓說：「可能大會冇安排，最緊要睇係咪工作需要合照，我哋都唔認識。」可覺千語BB升呢扮大牌？她說：「其他人唔方便過問。」講七次愛你是否肉麻？陳嘉桓尷尬道：「唔知，問番應該答嘅人，關我乜事。」
嫌棄被封「吳七愛」
被形容為小家避陳嘉桓的千語BB由黃百鳴陪住做訪問，她否認見到陳嘉桓即掉頭走，又謂之前跟對方有數面之緣，也曾作自我介紹。當聞得有新花名叫「吳七愛」，千語BB即面色一沉說：「唔知！冇睇！好多花名得啖笑，鍾意點叫就點叫。」旁邊的黃百鳴笑言千語BB最好聽，但得知連黃夏蕙都被叫BB時，黃百鳴忍不住說：「我屋企隻狗都叫BB呀！」另外，千語BB又否認林峯租住愛都大廈與她同居的傳聞，而身為無綫親生仔林峯的女友，千語BB做亞視嘉賓不怕被列入黑名單？她說：「唔會，好開放嘅，我又冇合約，嚟係支持老闆。」
採訪：王崇穎
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/