【台北】台灣女星小S（徐熙娣）老公許雅鈞早前捲入三亞淫亂派對風波，小S即刻出嚟撐老公，前日下晝4點半，兩公婆喺風波後首次行埋，齊到台北某明星私立小學接七歲囡囡許俏妞放學，素顏嘅小S着住平價牛仔褲同背心，同其他師奶邊傾邊等女放學，反而許雅鈞着皮褸黑褲鬼咁潮，兩個衣着唔多夾喎。
老公攞勞作
校門打開，小S兩公婆同其他家長一樣第一時間閃入去接女，好快就見佢哋拖住囡囡出嚟，許雅鈞攞住囡囡嘅勞作行先，小S就拖住許俏妞喺後面，可能因為台灣有H7N9禽流感確診個案，囡囡戴住口罩出嚟，做足防護措施，許雅鈞雖然行先，間中都回頭望吓妻女，停低等埋，跟住一家人上車返屋企。
平日小S除咗錄影《康熙來了》嗰一日外，其餘時間照顧三個女都親力親為，今次老公都出動埋，相信感情冇受淫亂派對風波影響。
撰文：林妃
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/