記者陳慧兒被退休多年，本來好得閒，平時偶然有人搵佢做傳媒聯繫（media liaison），皆出於特發性需要，例如打官司，呢啲工夫對佢嚟講，容易到極，點知做咗一兩次之後，竟然有啲律師嘜住佢，只要客戶有需要，就會call佢，原來打官司都或者有需要與傳媒溝通嘅。
陳慧兒英文名叫Lucy，畢業後做過母校（新亞書院）新聞系導師，有啲學生叫佢Lucy老師，叫叫吓，係新聞界行家都叫佢做「老師」，政界人物亦如是，佢幫梁家傑競選特首，梁家傑叫佢「老師」，去年幫唐英年競選特首，依家唐英年見親佢就叫「老師」，不知者仲以為佢嘅輩份高得好緊要㖭，「老師」其實係花名啫。
呢排見佢突然忙碌起嚟，到上海總會學書法都冇咁靜心，朋友校友問佢為乜，佢話：「到數碼廣播電台DBC做節目呀？」點知冇人知，冇人聽過佢做節目，仲問：「你埋咗大班堆咩？數碼台好似執咗咯噃！」弱台就是如此，做乜都冇乜人知，只有麥潤壽啲fans知。左丁山對電台消息幾關注，知道黃楚標唔知為乜理由，拿出億幾元，收購鄭大班、神童輝等人股權，讓舊股東原價出售，冇人蝕本，全身而退之後，就委任麥潤壽做台長，預期振興數碼台，搵番一班舊骨幹返工，希望頂住先，下半年或有鴻圖大計都未定。
老師就係咁俾人掹咗到數碼台做節目，主持星期二、五晚上五時至八時嘅時事節目，呢個時段一個星期五晚，主持人除老師外，還有資深新聞界前輩梁天偉、關偉，與老師嘅新亞師妹盧愛玲等等，成班主持人加加埋埋有一百五十年新聞經驗，理應有睇頭，但數碼廣播至今未解嘅難題就係點樣聽得到！鄭大班時期，數碼廣播（DBC）據聞已賣出，半賣半送，送出，大約共六萬部數碼收音機，另外apps下載超過十萬，用iPhone收聽甚為容易，但係的士好少有的士司機開着收音機聽（DBC），市面就少咗noise，對數碼電台不利，麥潤壽啲fans多年青人，梗係識點樣去收聽啦，但一般人慣咗用傳統收音機，係收唔到數碼廣播嘅呢！