潮流要浮誇，所以過去一周在港九四圍漂浮嘅巨型鴨仔搶盡眼球，佢夠誇張博你like，你like咗佢就夠潮，大家一齊感覺良好自我膨脹，未來呢幾日能夠同巨鴨合照一張大頭相，應該會係全城指定動作。
不過，阿巨鴨千祈唔好漏氣爆煲，否則可能會引來更多post同埋comment，正如西九嗰篤屎一樣，漲卜卜時冇乜人留意，一瀉如注之後就引來訕笑不絕。「屎我係一篤屎……」其實漏氣之後佢更似一篤便便，可謂神來之筆。
至於球場上嘅兩隻巨鴨，威風一輪之後終於輪流爆破，巴塞同皇馬一係唔爆，一爆就各自穿咗4個窿，令到兩岸圍觀者嘩聲四起，有人睇完熱鬧走都走唔切；有人勇敢舉機方便之後抽水；亦有人把握時機大講事後孔明，話幾鋒利嘅劍都有生銹嘅一日，何況一隻膠鴨！
4:0同4:1嘅賽果確實睇落又係幾懸殊，令原本只係德國fans吹水嘅德甲決賽美夢確實係會發生，不過我就替未來呢幾日嘅各大名家慘情，因為似乎見唔到有人話西甲球隊可以大逆轉，有關標題大概可以想像：巴塞皇馬小勝出局格！大膽啲嘅直頭話拜仁多蒙特贏多場昂然入決賽都有，咁有冇人夠膽死捧巴塞皇馬呢？環顧全球媒體，我只係見到得摩連奴一位仁兄有咁嘅guts，話佢仍然有信心皇馬可以入決賽，講完冇耐，就傳出佢將會撬埋法卡奧重返車路士嘅小道消息，哦，唔怪得之，都諗住走人冇包袱下就當然乜都講得出口啦。
網上流傳：「輸波時你唔撐我，贏波時使鬼你撐咩！」踢波唔係贏就輸，作為球迷當然明白得很，之不過巨鴨粉絲們突然一夜之間全部潛水就顯得有點唔夠「雷氣」。都明嘅，可能真係冇乜點受過考驗，作為班霸級球隊我數你就有啫，你數我，呵呵呵，走先。
據講樂壇同球壇都有一班Glory Hunter，專門係捧攞獎盃嘅風頭躉，本來又冇乜所謂，但隨風擺柳，你就錯過咗人世間最正斗嘅勝利：反敗為勝！有耐性的話，其實每隊波都會等到呢一刻！可能只有弱隊粉絲先明：輸都可以型、出局都可以好光榮！
keyman
now TV主持
mailto:[email protected]