通達集團（698）受惠智能手機需求熱爆，接到爆晒單，超級肥仔水，博翻半番。通達主打智能手機及電腦外殼產銷。啱呢個月中，報載通達今年第一季營業額增幅理想，去到第二季，更加接到爆晒單。咁睇，製造業都好講做邊一瓣數，而家陣智能手機全球熱爆，兼不時推出新型號，通達食正呢潮水，已經和味龍。又集團與時俱進，開發咗適用於4G流動設備嘅LD Santenna技術，兼且係市場獨家。而隨住4G普及，呢類高增值產品，亦都有助提升通達毛利率，肥過肥仔水。通達往績PE得7倍，兼且有4厘高息，已經夠晒吸引。係咁意計數，集團2013年度純利增長30%到3.9億銀，預期PE跌到得番5.6倍，現價翻半番到0.69元，2013年度PE，不過8倍。
浪潮冷灶可煲
浪潮國際（596）圖表三條平均線扭埋一齊，等爆。祖國搞智慧型城市，無論基建或金融業落區發展，IT業界一樣受惠，亦一樣有concept。Before that，浪潮PB得0.7倍，淨現金高達11億銀，每股淨現金同現價（0.285元）差無幾，超級現金牛。博資金輪流炒，開IT呢瓣，冷灶煲浪潮升20%到0.35元，未有耐上到NAV。
錢雋