既是學者也是企業CEO的司徒永富，曾在97金融風暴狠狠跌一跤，他十多年來沒有再沾手物業買賣，主要揸現金，難道是一朝被蛇咬？「是味蕾改變！」他說話總是玄玄哋。一切愛恨嗔惡源於心理不平衡，但要領略到可能先要像他一樣蝕鑊甘。
記者：葉淑貞 攝影：何家達
在97年金融風暴前，司徒永富三十出頭，大學讀經濟，又從事金融界，玩投資遊戲是理所當然，「我刻意地規劃人生，在當打之年，及早起步、及早埋岸，就可以實現理想，進行下半場好精采的人生，動機是善良的，尤其是找到不斷複製的成功方程式。」
那時，朋友來電話，建議合組小財團買樓，「對方噏個數，好呀，預埋我，連支票都未開，就收到朋友再來電，話賣咗啦，每人分廿萬……錢咁易搵，點解仲要返工、對住個低能無知嘅上司？一個月才出一次糧，好慢喎。」
「社會環境會令你產生羊群心態，朋友之間會互相比較。假期飲完茶，就去睇示範單位；去別人屋企作客，會不經意問人間屋值幾錢？人哋得，自己無理由唔得……」滿腦都是錢的日子，相信不少六、七十後還依稀記得。
曾短時間內連買五物業
曾經在短時間連買五個物業，「最初得一間，然後見樓價升咗，心雄了，一般人會賣樓去換，但好勝的人，唔會咁諗嘢，會加按買第二層，然後打包再加按買第三層，我甚至乎碌卡攞錢，是條不歸路，成30厘息，點還？」碌卡買樓，現在不多見，但在那只爭朝夕的回歸前後，是一種常態。唯一慶幸唔玩孖展，「不過有買仙股，貪升得快，𠵱家除晒牌！」
風暴吹至，物業成為跌剩三分一的嚴重負資產，「放咗兩個，剩下銀碼不太大的舊樓死頂，好彩收入漸漸好轉，不必再賣樓。不過步伐打亂晒，要延後生仔！」當時其中一個出售的物業是元朗錦綉花園，如今他的三口之家也住錦綉，但單位是租來的，「將剩下的物業出租，租金用來租返錦綉，就唔會覺得生活質素有變。」轉眼15年過去，他從沒有再買樓的念頭，「我都唔知點解，就是無衝動，幾心如止水。」
「心理不平衡 因為愛比較」
回顧這段心路歷程，他坦言最初「幾憤怒」，「我無破壞生態，唔係偷唔係搶，點解會咁？最難頂是有些朋友儍儍哋又好好運，因為害怕回歸賣樓移民，避過一劫，到沙士後返香港發展，又撈到底！總之，心理不平衡是因為愛比較。」
這一次跌倒，司徒永富形容猶如被鎚仔「扑醒」，「在此之前，我在投資上從無挫折，以為只要事情依照常態發展，就可以進入『永生』，但世界原來唔係咁，大自然好哋哋會出現四川地震、福島災難，經濟亦是如此，平靜下來，我就釋懷了。花無百日紅，必有借勢調整，只是人類從來不會在歷史中汲取教訓。」
恍如大徹大悟的司徒永富，這幾年完全平衡了心態，「人到中年，就會有好老套的想法：無健康，講甚麼投資？錢可以買床褥，但買不到安睡。多做好事、多分享、瞓得着，家庭、健康是投資，對人好也是不必花錢的投資，因為自己出事，就有很多朋友撲出來幫你。人的豐盛不是由金錢獲得，『富在心中』就係咁解。」
〈不怕輸通脹 寧願揸現金〉
【穩陣至上】
今日的司徒永富寧揸現金，以現代人角度，輸通脹都輸死你，但他不同意：「我哋在乎貶值，是因為條氣唔順，但用來投資，輸的可能不止此數！」
投資損手 或勁過負利率
太座08年提早退休，拿回一筆退休金，銀行職員時常來電推銷基金，太座遂問問為夫高見，「乜嘢新興市場呀、俄羅斯呀……成日哦住我，好啦，少少哋買廿萬，結果𠵱家蝕三成！就算負利率，都輸唔到咁多。」
司徒永富的理財方法變得隨意，覺得「有就自然有」，「起碼一半資產為現金及流通量極高的股票。房地產是香港人眼中的低風險投資，買樓無可厚非，反正我已買了三個，到我兩腳一伸，有屋仔留給心愛的人，夠啦。」
〈矇查查發達 隨時會破產〉
【先做功課】
司徒永富在樹仁教書，常會接觸年輕人，兩代理財觀，着實南轅北轍。
「以前自己賺錢再投資，𠵱家年輕人有支援體系（父母），拿了政府貸款不交學費，去買股票，還大條道理拎實戰經驗，風險意識好低。還有一些，靈魂未歸位，很hea，乜都學吓，乜都可以影響自己，無style，人哋《江南Style》都係style吖。」
定期儲蓄 可變百萬富翁
年輕人該如何理財，夠老套的：「假設搵12,000元，無論如何存起2,000元，廿年後都變百萬富翁。」他說，人生規劃必然包括財富管理，有儲蓄習慣的人，理財意識會更高更精明，不易聽從花言巧語。
投資前勤做功課，知易行難，「有朋友請你入股茶餐廳，你都會問吓：地點、由誰去管、賣甚麼食品吧？點解買股票時，卻不會去問由誰管？行業是上行還是下行？甚麼新興市場、倫敦金，你懂嗎？矇查查發達，將來就會矇查查破產。」
〈分身有術 兼執教鞭〉
【小檔案】
司徒永富在八十年代於樹仁畢業，再到美國進修，現為鴻福堂執行董事、樹仁大學工商管理系系主任，兩份全職都做了十幾年，認真分身有術。
99年加盟鴻福堂，一手令品牌年輕化兼且「神」化——他講心靈勵志、講良心企業，而且極熱衷基督團體事務。
有理由相信他真的長情，錦綉花園一住十多年，全因懷念美國南部感覺。獨子力峰像他一樣細細粒，但論生活質素，自然強過父親童年時很多，「不要抓富，也毋須抓窮，有甚麼能力就過甚麼水平的生活。」
看小男生穿着阿仙奴波衫，在屋苑人工湖畔開心踏單車，富有生活，大抵就是如此。
