容祖兒、陳奕迅（Eason）、劉小慧和女兒昨日到尖沙嘴出席器官捐贈活動，祖兒和Eason即場簽署器官捐贈卡，祖兒謂自己冇吸煙可捐肺，還笑言：「腦都得，因為冇乜點用。」
祖兒的忠實高登網友「慈雲山鄭列瓊」近日變節倒戈，發文賀祖兒死敵楊千嬅奪影后，狂踩祖兒：「連DaDa都超越你呀，拎多十年八年女歌手都唔及人哋千千拎影后加歌后，繼續做香城歌后啦。」又上載祖兒歷年電影票房紀錄，暗寸她是票房毒藥，及質疑她在06年演唱會唱快歌咪嘴，瓊姐變節成為高登熱話，昨日祖兒獲悉此事愕然反問：「係咩？最近踩我咩？唔知喎，兩個月前佢仲喺微博讚我靚，佢支持我梗係開心，唔支持又冇簽死約。」
祖兒對瓊姐變節原因一頭霧水，反問記者是否自己講錯說話得罪對方？記者指可能她曾批評瓊姐是偏激fans惹禍，祖兒說：「我個人比較率直啲，都係做番自己，鍾意做乜就做乜，讚同彈都係睇過就算，可能人哋一段時間鍾意你，但另一段時間又有意見，自己唔會俾言論影響生活，網友寫嘢唔使負責任，大智慧係唔睇。」
Eason賺錢多過成龍
同場的Eason在福布斯中國名人榜排名第6，他笑說：「有啲驚，能力越大責任越大，有乜理由我賺錢多過成龍？未必係真，我都係做番自己啫，唱好啲歌。」問是否影響力大了，言行舉止要小心？他說：「乜位置都係咁做，近年做多咗善事，之前同學友合唱《同舟之情》，最近好多港人情緒唔好，希望合唱提升士氣。」
另Eason為內地節目《中國最強音》做評審，惟節目反應不及《中國好聲音》，Eason希望觀眾不要太快下評論。
採訪：胡比
攝影：黃文偉
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/