【隔牆對論】
記：《蘋果》記者 梁：梁國雄
替補惡法拉布，社民連、人民力量曾贏得掌聲，今次就特惠生果金拉布，不但建制派聲討，泛民也劃清界線，不支持拉布，更主動撤回自己的修訂案。
記：今次拉布，是否錯判民情？
梁：呢個唔係民情問題，而係做人有冇誠信嘅問題。舊年12月7日爭取長者生活津貼免資產審查，我一時失策被「剪布」。我當時已講咗，如政府乜嘢都唔做，我唔排除再拉布。當時民建聯要將（長者生活津貼）資產上限調到30萬、自由黨話70萬、工聯會要免資產審查、泛民要求全民退保。直至今年4月，冇政黨再提過呢件事。政府又一直唔理，話喺扶貧委員會傾，但周永新（負責研究的港大學者）都講咗，睇唔到2017年前有共識，咁即係今屆都做唔到啦。
有人話啲咁細嘅嘢，唔好用拉布。乜原來為香港老人家爭取全民退保係小事，係唔值得，唔應該盡力爭取呀？一件小事，做十幾廿年都做唔到，我覺得好心酸。
記：市民明白你用意嗎？如何看主流泛民跟你劃清界線？
梁：市民未必明，咁拉拉吓（布）就會明。其實泛民主派最壞嘅就係：一驚起上嚟就即刻跳船，猛咁鬧我哋，講嘅嘢同政府一樣，就咁聽仲以為梁振英喺度開緊記者會。
可能我都做得唔夠，我只能喺我能力範圍以內做。咁到底舊年12月7日後，有邊位議員同梁特首爭取過全民退保？如果你哋乜嘢都冇做過，咁點怪我做呢樣嘢呀？
全民退保，上世紀80年代已開始講，都成40幾年，到底邊個拉布呢？係我長毛拉布，定係個政府拉布？佢哋同我切割有乜嘢用呢？佢應該去譴責個政府呀！我2004年當選時，大家喺遮打花園泛民一字排開話要爭取全民退保，咁𠵱家全部都煙消雲散啦，佢哋有份誓師喎。我冇要求佢哋撐我，最麻煩係佢企咗去對面之嘛。
泛民擔心今次拉布會「玩大咗」，拖到5月，公務員會冇糧出，而長毛想幫的長者，也不能獲發生果金。
記：拉布爭退保，但會否先導致公共財政危機、公務員、綜援戶「冇糧出」？
梁：今次泛民反應好大，擔心癱瘓政府，公務員冇錢出糧，假嘅！因為有其他方法攞錢。根據法例第2章《公共財政條例》第7條，可申請臨時撥款。問題係佢（財政司）做唔做、主席（曾鈺成）批唔批。而且政府可以同我哋談判，講幾時設立全民退保，有時間表、路線圖，當然撥埋款最好。2011年，（曾俊華）話要注資入強積金戶口，後來全民派錢，咪又係嘈番嚟！
記：既然不會癱瘓公共財政，政府怎會有壓力？
梁：會！會造成一個壓力，點解個政府嘥咁多時間，都唔畀錢出嚟。我哋唔係要公務員冇糧出，我要政府感受嗰個危機。
主流泛民強調，拉布是大殺傷力武器，不能胡亂使用，否則只會令市民麻木。
記：公民黨毛孟靜曾撰文指要防拉布疲累症，「不可日日狼來了」。
梁：咁佢哋唔覺得，香港市民有種「反對無效疲累症」？大把市民覺得立法會得個講之嘛，講完就算。毛孟靜議員覺得冇呢樣嘢咩？佢覺得立法會非常之威猛咩？政改一役，乜嘢係有「反對無效疲累症」，於是走去談判囉，搞到咁杰囉。如果話呢個係核彈，真係笑死人。立法會根本就冇用，唔通呢個預算案過咗，香港人就會覺得呢個立法會係有用？我哋喺個議會度講，可以令到咁多人知，如果我哋可以根據議會職權制衡政府，咁我哋盡量做，如果連呢樣嘢都唔做，咁喺議會外做囉。
記：會否擔心今次拉布，會導致建制派加速討論剪布機制？
梁：如果有件武器係長期唔用，咁畀咗個權你都係冇意思。大家要記住，唔係我開始喺長生津拉布後，葉國謙先話要剪布，佢一返嚟已話要剪布。人哋剪你之前唔用多幾次，點呀？等佢剪咗你先用呀？如果我哋做得好，可能佢哋難啲剪我哋布。
記：議會應否有剪布機制？
梁：議會剪布機制係應該有，只要個議會係普選產生咪得囉。我哋佔多數（得票）嘅議員，要用其他國會少數議員嘅方法，去攞番我哋嘅權利，呢個最弔詭。（如果）喺外國，係我哋𠵱家通過全民退保法例，自由黨、民建聯去拉布阻止佢通過。根據選票，應該係咁。
𠵱家我哋咁折墮，用一個國會少數常用嘅方法，去行使香港議會多數授權民意嘅權力。如果有全面普選政府同立法機關，要得到若干人同意才可剪，以保障少數權力。立法會內所謂多數，其實係少數，全部顛倒同歪曲咗，先發生咁多嘢。如果大家咁鍾意主持正義，出來講吓啲真嘢囉。呢個係好大問題，我講過好多次，啲記者都冇興趣。
http://[email protected]