【隔牆對論】
過去一周，召喚議員「歸位」點人數的「禪院鐘聲」又再響徹立法會。今次拉布戰的目的，是社民連、人民力量要迫使政府設立全民退休保障或派錢。主流泛民不支持今次拉布，曾任立法會財委會主席的民主黨劉慧卿「唔同意一爭取唔到就拉布」，她指拉布極具殺傷力，要在對抗23條、捍衞人權法治等關鍵時刻才使用。社民連梁國雄（長毛）則指出，全民退保已爭取了40多年，泛民應站出來譴責政府「拉布」，而不是與他割席，他反問泛民，知否香港市民也有一種「反對無效疲累症」？
記者：姚國雄 雷子樂
卿姐寸：唔係搏命就攞到
記：《蘋果》記者 劉：劉慧卿
除了社民連和人民力量，泛民主派今次表明不會參與拉布，認為拉布最終會癱瘓政府財政，市民也不想見到。
記：社民連是想透過拉布爭取全民退休保障，為何不支持拉布？
劉：我哋建議15年免費教育、增加安老院宿位、醫療服務，你淨係抽一樣「全民退保」嚟拉布，其實你可以抽好多樣。我哋唔同意一爭取唔到就拉布，拉布係好有殺傷力，亦唔係慣常用。例如政府要搞23條、做違反人權、法治嘅嘢，我哋會用拉布頂住，但生果金又拉布，各樣都要拉布。佢哋（社民連和人民力量）當初話啦，唔係成日都會拉布，但𠵱家幾個月就一次。
記：長毛說，拉布不會導致公共財政癱瘓，因為政府大可以再次申請臨時撥款。你是否認同此做法？
劉：其實政府已申請過一次臨時撥款，係咪可以做咁多次，會受人挑戰。而且，臨時撥款再嚟要「打尖」，有啲人可能會反對打尖，到時又會再有紛爭。我唔會建議咁做，因為未必止到咳。
除了不參與拉布，泛民更撤回多個宣示立場的修訂。民主黨南區區議員區諾軒反問高層：「政黨基本的立場去了哪裏？」
記：為何多個修訂案也要撤回？
劉：因為我哋要話個清楚訊息畀社會聽，就係我哋係唔拉布。上次生果金，民主黨都係唔同意拉布，但因為我哋提咗10多個動議，但傳媒就唔理，寫「泛民拉布」，之後我哋同市民點樣解釋都冇用。今次收回所有修訂案係其他民主派建議，民主黨好珍惜同其他民主派嘅共同立場，大家未必想見到泛民黨派嘅步伐唔一致。
記：是否有信心按現行機制同政府傾、去遊行示威，寫信逼到政府做全民退休保障呢？
劉：我覺得盡力去做。我哋唔拉布，唔表示我哋做唔到嘢，我哋都只係唔一齊拉布，唔係唔做嘢。如果係，市民都唔會選我哋做議員啦。我哋接觸好多市民，都係唔鍾意今次拉布。
記：長毛說，議會有「反對無效疲累症」。你在議會22年，對長期爭取的東西毫無寸進，是否也感無力？
劉：我最無力係當年我嘅私人草案（直選方案，欠一票才通過），但係有時係冇辦法，你係要接受，彭定康叫我砍頭埋牆，我梗係唔會。但議員有時要明白，唔係搏命爭取就會攞到，攞到梗係好啦，但你盡咗力，你問心無愧，繼續去做，市民係會接受，佢係會支持你，市民梗係希望我哋可以做得更多。
拉布這個策略，由2010年的高鐵撥款以來，當時669億元的高鐵撥款橫跨一個月。劉慧卿當時主持會議，泛民成功拉布，撥款也最終獲通過。劉慧卿為泛民和建制派所稱頌，指她大公無私。
記：當時如何平衡各方？
劉：我認為要掌握各方面意見，等我知道大家想點，我當時講明畀政府聽，議員要做乜嘢，你要尊重佢。我當時問晒議員，有幾多個問題要問，想問乜嘢。成件事，我覺得要議員要同你合作，但呢啲合作，怕且𠵱家都冇咗。當時立法會外面係有幾千人睇直播，所以議會發生乜嘢事都會影響群眾情緒。
記：你是否同意立法會要設立「剪布」機制？
劉：我認為社會要深入討論，立法會要開公聽會，請學者、智庫畀意見。如果大家認為唔好做，咁咪維持現狀囉。咁係咪𠵱家就要開始討論呢？要睇吓呢件事點樣發酵落去，我唔覺得逼切。
拉布係議員權利，文明嘅國會會議都有拉布，拉布係讓少數議員，就佢覺得一啲非常不滿嘅法案，拖延程序，我係好明白，亦都尊重。