【富黛愛忽完 之 渴望】熊黛林（Lynn）在微博宣佈與郭富城「分」訊後，回復單身的Lynn迅速投入工作，前晚出席上海的內衣活動後昨日返港，對於有指她戀上城城前，在內地已有一個拍拖4年的男友范駿，Lynn說：「我覺得啲報道越嚟越無聊，一路以為我過去7年，無數次俾人嫁咗出去，原來我真係錯咗，唔係7年，係8年前已經俾人嫁咗出去！」
堅稱從未訂婚的Lynn被問到有否與范駿拍拖，她說：「我唔想再講咁無聊嘅嘢！呢啲唔係事實，唔需要解釋，我預咗會有更加多寫衰我嘅嘢，我已經頂咗7年，都頂得順！」她還決絕表示不記得這個人，她聽到有指對方為此事表現心涼，即不屑地說：「嘩！多謝關心喎！」
城城仍是朋友
被問是否跟城城再見亦是朋友，Lynn點頭承認，亦不介意與苟芸慧同台工作，再問有否準備接受新戀情？Lynn說：「我諗都七七八八，慢慢開始，但係一直都冇得出街，所以未有人追。」如果有新戀情會否除掉「分」戒？她說：「如果有一日我覺得好幸福、好幸運，唔使再需要呢隻戒指帶畀我幸運，我諗我會除低，但係我𠵱家覺得唔夠幸福。」是否城城帶不到幸福給她，她說：「唔係呢啲囉！」
老公張智霖與城城十分老友的袁詠儀亦現身機場，她最初八卦問記者等甚麼，但一聽到熊黛林的名字後，便立刻封嘴，再追問靚靚有否與她聯絡，她隨即急步走人。另外，汪圓圓前晚現身中環時裝活動，問到好友熊黛林及茍芸慧會否做姊妹，以及會否跟城城同場出席婚宴時，她說：「佢哋好忙，應該做唔到姊妹，當然多啲人嚟開心，不過婚宴都未定賓客名單。」
採訪：黃曉妍、梁錦雯
攝影：仇志德
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/