四川又發生大地震，人民傷亡慘重，五年內第二次咯噃，無怪一位四川農婦哭訴：「上天對我太兇了。」大地震，固然係天災，但七級地震造成重大傷亡，可能亦涉及人禍，例如道路山坡平時有危險無人理會，屋宇學校係豆腐渣工程產品，與官員衙門貪污有關。
2008年汶川大地震，不少身邊朋友第一時間踴躍捐款救災，甚至身先士卒立即去四川做義工，協助災後重建者，大不乏人。但這日在中環午飯，連問幾位老友，個個都話冇乜興趣捐錢，態度與2008完全不同。首先講自己，左丁山自知個人財力有限，老早訂下捐錢目標，就係只捐款俾本港中學與大學做獎學金，而且只捐俾自己熟悉、有關係嘅學校，其他各式各樣捐款，恕不參與。香港有七百萬人，大陸有十三億幾人，香港捐錢俾內地，如一碗水注入萬宜水庫，完全起唔到甚麼實質作用，捐款全是心意啫，自有成龍、曾憲梓、中資商人等等有頭有面富豪為香港盡吓心意。
第二，成班老友想起2008年之捐款去向如何，都幾冇癮，律師H捐咗俾教會，教會捐俾內地聯繫機構，後來啲錢究竟點用，教會亦無法知得清楚。醫生C捐款重建小學，後來知道間小學重建過程糊裏糊塗，嬲足兩年，如此故事，人人有一個，加埋起來，就影響今次捐款意欲。
唔係話叫人唔好捐，捐款做善事總係善有善報，福有攸歸。不過捐款助人，總要有清楚目的，清楚知道啲錢點用，自己唔係大富豪，捐錢做咗羊牯係人生最氣頂之事。況且中國同胞有錢到極，胡潤富豪榜調查得知，中國擁資產過億元人民幣嘅，有六萬四千五百人。廣東佔咗九千六百個，北京有一萬人以上，觀乎上星期六中環大金舖還未開舖已有同胞排隊入內買金，只要佢地肯捐錢，已有力過香港同胞好多，譬如每年來港自由行掃貨嘅內地遊客數以千萬計，每人捐兩百元人民幣，起碼有50億元人民幣，數目不算少！