歐聯決賽勢成德國內訌戰，季尾波值得睇嘅唔多咯；博彩，當然仍堅持硬闖聯賽僅餘嘅亂局。近期強調此階段聯賽宜輕視往績，捧仲有澎湃戰意及近態出色者，唔會大錯，重心撐阿仙奴死敵、熱刺作客拔「根」開上盤！
周中接連3晚大部份時間幸能頂住睡魔，先親睹無敵德軍如何接連蹂躪西甲雄師，證歐洲球壇轉勢已成，呢份滿足感絕非單係個人喺名家擂台，歐洲賽三連W咁簡單。賭波有時係要抽離主觀喜惡，順勢而行。拜仁及多蒙特近期全隊on form嘅霸氣，自信爆燈，就算唔鍾意賭同睇德甲、下季準會由「畸寶」過檔「現在」睇英超嘅球迷，都會感受到佢哋嘅威力；另一邊嘅C朗同美斯去到季尾獨力難支，仲有架一直認為佢哋爭歐洲賽緊要過聯賽前列嘅車仔，文尾再談。
先講上次點題嘅英冠球隊保頓，續排喺第6，至執筆時未知早踢一日嘅「7哥」李斯特城主場鬥屈福特嘅戰績；但無論如何，今晚為保前6嘅升班附加賽一席嘅保頓，作客到已封王嘅卡迪夫城，起碼要搶到1分或以上先有價講。卡城已肯定做「1哥」升班，今季還剩呢場主場波，賽後必提早開派對與擁躉同樂，戰意有幾多，可從近5戰只得1勝4和見到。保頓作客雖差仍有5成不敗率，挾近期勇態要回升搶1億鎊收入，戰意如虹，[+1]應穩，可考慮博冷W。
英超隊中，作為阿仙奴躉多最恨熱刺，不過賭波唔好講感情，熱刺上仗有加里夫巴利復出，反勝曼城士氣大振咯，情況一如阿仙奴早前殺低拜仁開長勝路，及曼城贏完曼聯再喺盃仔淘汰車仔，自信返晒嚟；今次熱刺作客護級心切嘅韋根，莊家開出客軍少讓平/半低水，算值博。
熱刺喺歐霸盃出局後已可全心向前4出擊，從上仗能末段反勝，證體力也雄厚；韋根現時形勢博和幫助不大，沉唔住氣焗攻，勢被有艾朗連儂復出，聯同巴利雙翼齊飛嘅熱刺收死。
再談車仔，一直相信季後走人嘅賓帥重歐霸盃多過爭前4，大家以為佢啱啱周中盃仔排弱陣，臨場票數軟弱，實在諗錯肥賓；大衛雷斯推前打防中掃蕩，出番一班英兵個陣容仲平衡。明晚匆匆再喺主場迎打風流波、但控球能力突出嘅史雲斯，主W得1.3倍過份。個人仍覺得今屆踢唔到前4攞歐聯位，唔係兩支北倫敦宿敵。
（下次見報日期：4/5）