H7N9來勢洶洶，政務司司長林鄭月娥落咗柯打，要重新搞香港清潔運動，各位高官今日起一連三日落區清潔，林鄭仲將呢個活動，當成佢嗰壇「家是香港」嘅重頭項目㖭。
既然係林鄭嘅心血結晶，擔任清潔大隊長嘅佢梗係會打頭炮啦，佢今日會去大埔親手抹欄杆。平時十指不沾陽春水嘅佢，相信都係當做吓騷；其他司、局長稍後都會輪流出巡，拎住掃把或者抹布搶吓鏡頭咁啦。
煲呔03年做過清潔大隊長之後，05年終於「升呢」做特首，林鄭會否步佢後塵？八方都唔知呀，只知食環署今日起開始更強硬執法，一見到垃圾蟲或者邋遢店舖，就會出票檢控唔手軟。