「功夫就是時間。」葉問在電影中這樣說。中國廚房內的功夫，也是一層層的練，揑得比掌心還小的功夫，就是點心。近年一街都是點心店，同時，高級食肆亦掀起貴價點心戰，點心熱，未停過！
記者：何兆彬 攝影：黃子偉、陳永威
服裝提供：uuu shooop
髮型：Philip Lee@HAIR
形象設計：Sofa Chan@DATSAP CREATION
專點內臟嚇老外
「我媽咪最鍾意同我哋去飲茶！」約鬼妹仔陳明恩試點心，她用流利廣東話講起吃點心的點滴：「我喺香港出世，父母都會講廣東話，我哋經常去飲茶！每逢有外國朋友嚟，我就會帶佢哋去酒樓，專點雞腳、內臟畀佢哋食，嚇吓佢哋！哈！我自己就乜都食！」跟對飲食不算講究的明恩來到米芝蓮一星的國金軒，她興致勃勃，聽總廚余偉經師傅介紹，試食過一輪後說：「果然係唔同喎，蝦餃王最正！」先試海皇粉果，當中有帶子、蝦、桂花蚌等，粉果皮混入艾草，「好味，入面辣辣哋嗰啲係乜？哦！係XO醬。」吃點心，看一味蝦餃就知高低了，這兒的金箔笋尖蝦餃外有金箔，已見矜貴，皮薄是基本要求，餡料亦很講究，笋只用笋尖，這樣才夠香；蝦用原隻海蝦，這樣咬下才爽口。師傅解釋：「傳統用豬油，會多汁啲，但近年大家都追求健康，我哋用咗植物油同雞湯。賣相就要大細一樣，每籠約二両七，傳統上蝦餃要有13褶，不過𠵱家最緊要褶痕長短一致。而蝦餃蒸嘅時間最考功夫，一蒸過龍，你想夾就夾唔起啦！」明恩：「係喎，我啱啱夾咗好耐，隻蝦餃都無爛！」
國金軒（2315 5222）
地址：尖沙嘴彌敦道118號The Mira 3樓
＊另點心任食午餐，$348/位
點心追新不忘舊
早陣子潮網LifestyleAsia選了五所香港點心食肆，尖東天外天入選其中，「點心好壞，係睇粗細嘅分別，賣相要靚、件頭要好，高級食肆嚟講，其功夫要幼細。」總廚謝錦松解釋。參觀天外天製作點心過程，一個看似簡單的脆皮鮮蝦腸粉，先將餡料以絲網皮捲好，炸熟後包上粉皮，過程繁複，每一步驟師傅都一切再切，務求令點心大小一致。點心一向求新，但又不能忘舊，顧客吃點心，總懷念着舊日的味道，松哥：「例如燕窩鳳眼餃，喺六七十年代香港經濟起飛時出現，餡料用豬肉又鋪有燕窩，名貴又養顏。」松哥又同時向其他師傅學習，「舊年我哋請咗白天鵝嘅師傅嚟做懷舊點心，佢做嘅網油牛肉燒賣好好，當中用咗豬網油，再用澄麵做皮，然後以牛肉做餡，食落去有種陳皮香，又帶檸檬葉香。」由於豬網油不易清洗，因此坊間一般點心店做不來。
天外天（3400 1318）
地址：尖沙嘴科學館道17號唯港薈28樓
失傳芝麻卷香夾爽
鮮竹卷、牛肉等是剛入行都曉做的點心，難度最高呢？隆濤院點心部總廚林哥：「蝦餃！難度係喺餃皮形要圓，又要拍得薄到透明，褶紋要11至13褶，這個好有難度！至於燒賣，廿年前要包得形似鼓狀，蒸起嚟要脹起，每粒約八錢重，標準一籠二両四；近廿年就流行『揸腰』，即底窄面闊，好似菊花咁，而且每粒都要有份量，一籠要三両六至三両八！燒賣餡料亦好緊要，豬肉要彈牙，最好用大髀肉，咬落較腍又有冬菇味。」隆濤院近月推出點心自助餐頗受歡迎，賣的多是懷舊點心，代表作有幾近失傳的芝麻卷！「做芝麻卷都幾繁複，先把黑芝麻洗淨，烘乾，加啲白芝麻一齊炒，當白芝麻變金黃色，就代表黑芝麻炒夠啦，呢個係秘訣嚟㗎！芝麻卷要爽身、唔糊口，好多大陸師傅都將芝麻漿當腸粉咁拉，我哋就將芝麻漿煮至半生熟，用鐵盤載住，加入馬蹄粉，乾咗後仲會令身。」芝麻卷放近鼻，一聞，已經香得緊要，咬下爽口，每層亦很薄，童年回憶都返晒嚟！
隆濤院（3988 0107）
地址：尖沙嘴廣東道2A Hullett House 3樓
＊另點心自助餐，周一至五$190/位、周六日及公眾假期$230/位